![](https://mostylib.by/wp-content/uploads/0-02-05-4c3e5900cde1fb9c110e373cdfa36ad1bb78cd2b744a95ba7f02a9c863c97579_335cf3ebf4c4e354.jpg)
11 кастрычніка 1913 года ў горадзе Мінску нарадзілася беларуская паэтэса Эдзі Агняцвет. Яе нездарма называюць беларускай Агніяй Барто. Усё жыццё паэтэса пісала для дзяцей і пра дзяцей.
Сапраўднае імя – Эдзі Сямёнаўна Каган. Маці будучай знакамітасці працавала ў бібліятэцы імя Пушкіна (г.Мінск) і менавіта яна прывіла сваёй дачцэ любоў да літаратуры.
Першыя творы Эдзі Агняцвет былі надрукаваны ў 1929 годзе ў газеце “Чырвоная змена”. У 1935 годзе выйшаў яе першы дарослы зборнік “Маё пакаленне”. А першая дзіцячая кніга “Міхасёк” з’явілася ў 1944 годзе. Галоўнымі тэмамі яе паэзіі сталі барацьба за мір, абарона дзяцінства, інтэрнацыянальнае сяброўства і адзінства савецкіх людзей.
Вершы Агняцвет былі перакладзены на рускую, узбекскую, латышскую мовы. Сама паэтэса перакладала вершы Маякоўскага, Пушкіна, Някрасава, Ахматавай і Барто на беларускую мову. «Маленькі прынц» Антуана дэ Сэнт-Экзюперы таксама ёсць у перакладзе.
З нагоды 110-годдзя з дня нараджэння Эдзі Агняцвет Рагозніцкая сельская бібліятэка арганізавала гучнае чытанне вершаў “У свеце дабрыні”.
Дзеці з вялікім задавальненнем чыталі вершы “Зямля з блакітнымі вачамі”, “Маме”, “Буду настаўнікам” і другія. Вельмі спадабаліся і забавілі ўдзельнікаў гучнага чытання гумарыстычныя творы паэтэсы: “Бедны Саўка”, “Баксёр”, “Як Людміла ў госці хадзіла”.
Вершы Эдзі Агняцвет вельмі музычныя, гэта хутка ацанілі беларускія і рускія кампазітары. На мерапрыемстве дзеці праслухалі оперу “Марынка”, нават падпявалі і прытанцоўвалі!
На старонках твораў Агняцвет на самой справе жыве дабрыня і цеплыня, пераканайцеся ў гэтым самі – прачытайце яе вершы.
![](http://mostylib.by/wp-content/uploads/0-02-05-cf5e04ffea3acb02427175cb0b6e70793934ae8d85b4494ec41a987f75eabca6_1268ea60d6d36667-892x1024.jpg)
![](http://mostylib.by/wp-content/uploads/0-02-05-f20de8ce5e4267c914329bac5551148cab7edb5161f62ff3a6b40bef48ddb944_c874540ec499480e-1024x733.jpg)